Bang Media

Shakisha ku Urwego.com

Ibibazo by’ingenzi buri wese ugiye gushinga urugo agomba kubaza mugenzi we

Abahanga mu by’imibanire bagaragaje bimwe mu bibazo by’ingenzi buri wese ugiye gushinga urugo agomba kubaza mugenzi we, bijyana no kwita ku bisubizo byabyo kuko bihishura byinshi ku wo bateganya kubana.

Nta kintu na kimwe kidashobora kuganirwaho n’abakundana igihe bari mu mushinga wo kubana akaramata kuko iyo buri wese yifashe akanga kwinjira mu buzima bw’undi bishobora kubagiraho ingaruka mu gihe kizaza.

Abateganya kurushinga bagirwa inama yo kumenyana byimbitse binyuze mu kubazanya ibibazo mbere yo gufata umwanzuro wo kurushinga. Bimwe mu bibazo Huffington Post yagarutseho mu nyandiko yayo biganisha ku mubano urambye w’ahazaza.

- Utekereza iki ku gushakana n’umugabo/umugore umwe?

Birakwiye kumenya niba umuntu mugiye gushakana yumva kimwe nawe ibyo kubana n’umugabo cyangwa umugore umwe. Hari aho umuntu akururana n’abandi ku mbuga nkoranyambaga nka Instagram na Facebook ugasanga bivuyemo ubucuti ku buryo bagirana izindi gahunda biboroheye. Ibi mugomba kubiganira n’umukunzi wawe akakubwira uko abitekereza kuko bishobora kubitura hejuru mwamaze kubana, ugasanga ntimubyumvise kimwe.

- Ese hari ideni waba ufite nkwiye kumenya?

Kutaganira ku by’imitungo no kutamenya niba hari ideni umukunzi wawe afite ni ikibazo gikomeye ku bitegura kurushinga. Inzobere mu by’imibanire zigaragaza ko bikwiye kwirindwa kuko biba bibi kubimenya byageze mu nkiko.

- Ni iki ukunda gukora cyangwa se akazi uhora urota kuzakora?

Ni byiza kubaza umukunzi wawe ibyo akunda n’ibyo yifuza kuzakora mu gihe kizaza kuko bigufasha kumutera umwete no kutamuca intege. Ibyo kandi bigaragaza ko witaye no ku hazaza he atari ukwishimira urwego umusanzeho usa.

- Ni gute witwara igihe uhuye n’ibibazo?

Abantu bitwara mu buryo butandukanye igihe bahuye n’ibibazo. Hari abarakara bakitarura abandi ndetse ntibongere no kuvugisha n’inshuti zabo kugeza igihe birangiriye. Ni byiza ko ibyo mubiganiraho n’umukunzi wawe kugira ngo mbere yo kujya gushakana ube umuzi neza n’uburyo uzamwitwaraho mu bibazo.

- Bibaye ngombwa ni iki cy’ingenzi wahindura mu buzima bwawe?

Gusubiza iki kibazo bitanga ishusho y’ikintu cyananiye umuntu, akifuza kugihindura ariko bikanga. Ibi bituma ubona ko nagikora mu rugo rwanyu bitazaba ari igitangaza kuko uzaba ukimuziho. Kumenya intege nke z’umukunzi wawe bigufasha kumugira inama, yakora ikosa ntumuhutaze.

- Ese urifuza ko tuzabyara abana bangahe?

Ikibazo cy’umubare w’abana muzabyara ni ikintu gikunze guteza intambara hagati y’abashakanye, akaba ariyo mpamvu gikwiye kuganirwaho hakiri kare, hagafatwa umwanzuro.

- Ese iyo ugize ubukari ubyitwaramo ute?

Mu bintu bitandukanya abashakanye burundu harimo uburakari cyangwa se kuvugana umujinya hagati y’abashakanye

Birafasha rero kumenya uburakari bw’umugabo wawe cyangwa by’umugore wawe ndetse n’uburyo abyitwaramo mutari mwagirana indahiro , ukaba uzi neza uwo ari we.

- Ese niduhura n’ibibazo mu mubano wacu, uzemeza ko dusanga inzobere mu bujyanama?

Umuntu udashaka kugirwa inama igihe hari ibyo mutumvikanyeho, biragoye ko azemera ko mugira uwo mwitabaza mwaramaze gushakana.

- Ni ubuhe buryo butuma ugera ku byishimo bya nyuma mu gutera akabariro?

Ni ingenzi kubaza umukunzi wawe igituma agera ku ndunduro y’ibyishimo mu gihe cy’imibonano mpuzabitsina. Ibi byishimo biranezeza, birwanya umunaniro ukabije, bituma abantu bagira ubuzima bwiza ndetse umubano wabo ugakomeza kuryoha kuko biyumvanamo biruseho. Iyo ubashije kubimenya mutarabana bikwereka uko uzabyitwaramo ngo umukunzi wawe aryoherwe nacyo.

- Utekereza ko ari inshingano zanjye kugushimisha?

Hari abantu baba bafite imyumvire y’uko umugabo ariwe utegetswe gushimisha umugore cyangwa se ko kugira ngo umugabo yishime ari akazi k’umugore we.

Ibyo rero usanga iyo umwe atigeze abimenya bimubera umutwaro cyangwa se umwe akumva ko mugenzi we atamwitaho ngo yuzuze inshingano ze uko bikwiriye. Kubaza rero iki kibazo umukunzi wawe ntabwo ari ukurengera ni ukugira ngo bigufashe kumumenya neza ndetse niba uzanabyubahiriza

- Ni iki kigushimisha cyane mu buzima bwo gutera akabariro?

Inzobere mu byo kwigisha gutera akabariro zigaragaza ko iki kibazo kigaragaza ko witaye ku mukunzi wawe kandi ko udaca hejuru ibintu ahubwo witaye kuri buri kimwe cyose no ku buzima bwo gutera akabariro ukagira icyo ubumenyaho. Gusubizanya ibyo bibazo bishimangira ubufanye no gushaka kubaka umubano utagize icyo usize inyuma.


Related Posts by Categories



0 comments:

Post a Comment

 

Urwenya

Ubuzima

Urukundo